ترکی میں عمران خان کی حمایت میں مظاہرہ کرنے پر گرفتار 30 پاکستانی رہا

سابق وزیراعظم عمران خان کی حمایت میں ترکی میں بغیر اجازت مظاہرہ کرنے پر گرفتار کیے گئے 30 پاکستانی شہریوں کو منگل کی شام تنبیہ کے بعد رہا کر دیا گیا۔
اردو نیوز سے بات کرتے ہوئے استنبول میں پاکستان کے قونصل جنرل بلال خان پاشا نے بتایا کہ مظاہرہ کرنےوالوں میں 27 پاکستانی طلبہ اور تین عام شہری تھے جنہیں استنبول کے تکسیم سکوائر سے اتوار کو حراست میں لیا گیا تھا۔ ا
ان پر بغیر اجازت سیاسی سرگرمی اور مظاہرہ کا مقدمہ درج کیا گیا تھا اور اتوار کو پولیس سٹیشن میں رکھنے کے بعد سوموار کو پاکستان واپس بھیجنے کے لیے ڈیپورٹیشن سنٹرز میں لے جایا گیا تھا۔

بلال پاشا نے بتایا کہ گرفتاری کے بعد طلبہ کے والدین اور اہل خانہ نے پاکستانی قونصل خانے سے رابطہ کرکے بتایا کہ ان سے غلطی ہو گئی ہے اور معصومیت میں مقامی قانون کی خلاف ورزی کر دی ہے ان کو ڈی پورٹ ہونے سے بچایا جائے۔
ان کا کہنا تھا کہ تین شہریوں کی ترکش خواتین سے شادی بھی ہو چکی تھی اور ان کے اہل خانہ ان کی پاکستان واپسی نہیں چاہتے تھے۔
بلال خان پاشا نے بتایا کہ مقامی سطح پر کوششوں کے بعد ترکی کے دارلحکومت انقرہ میں سفارت خانے نے اعلی حکام سے معاملہ اٹھایا جس پر انہیں منگل کو افطار سے پہلے رہا کر دیا گیا ہے۔
تاہم ترکی میں مقیم ایک پاکستانی شہری کے مطابق گرفتار افراد کو رہا تو کر دیا گیا ہے مگر ترکش قوانین کے مطابق ان کے نام مانیٹرنگ لسٹ میں شامل کر دیےگئے ہیں جس سے مستقبل میں ان کو جابز اور دیگر مسائل کا سامنا ہو سکتا ہے۔

قونصل خانے نے کمیونٹی کو پہلے بھی خبردار کیا تھا کہ بلااجازت مظاہرے میں گرفتاری کا خدشہ ہے مگر طلبہ باز نہیں آئے تھے ۔
ترکی میں پاکستانی قونصل خانے نے اس حوالے سے آگاہی کے لیے ایک ہدایت نامہ بھی جاری کیا گیا ہے جس میں پاکستانی شہریوں کو خبردار کیا گیا ہے کہ بلا اجازت سیاسی سرگرمیوں میں حصہ نہ لیں۔
ترکی قوانین کے مطابق تکسیم سکوائر یا دیگر علاقوں میں غیر ملکیوں کو مظاہرے سے قبل مقامی گورنر کے دفتر سے اجازت درکار ہوتی ہے۔
یاد رہے کہ اتوار کو پاکستان سمیت دنیا بھر میں عمران خان کے حق میں مظاہرے کیے گئے۔سابق وزیراعظم عمران خان کو پارلیمنٹ نے اپوزیشن کی کامیاب تحریک عدم اعتماد کے زریعے ھفتے کو رات گئے عہدے سے معزول کر دیا تھا۔