وسیم بادامی نے اے آر وائی نیوز پر خبر دیتے ہوئے بتایا کہ اعلیٰ ترین فوجی ذرائع نے یہ کنفرم کیا ہے کہ وزیراعظم عمران خان نے فوجی قیادت سے رابطہ کیا اور کہا کہ آپ میری کس طرح مدد کرسکتے ہیں۔ اس کے بعد فوجی قیادت وزیراعظم ہاؤس پہنچی اور وہاں تین آپشنز پر بات ہوئی۔ ایک یہ کہ وزیراعظم عدم اعتماد کا سامنا کریں، دوسرا یہ کہ وزیراعظم عمران خان استعفیٰ دے دیں، تیسرا یہ کہ اپوزیشن تحریک عدم اعتماد واپس لے لے اور وزیراعظم عمران خان اس کے بعد اسمبلیاں تحلیل کردیں۔ وزیراعظم نے کہا کہ استعفیٰ دینے سے تو ان کی سبکی ہوگی، اس لئے وہ استعفیٰ نہیں دے سکتے۔ وزیراعظم تاہم تیسرے آپشن پر متفق ہوگئے کہ اگر اپوزیشن تحریک عدم اعتماد واپس لے لیتی ہے تو وہ اسمبلیاں تحلیل کردیں گے۔ فوجی قیادت وزیراعظم عمران خان کا یہ پیغام اپوزیشن کے پاس لے کر گئی اور اپوزیشن نے یہ آپشن ماننے سے انکار کردیا۔