عمران خان کی پشاور میں تقریر کے بعد وزیراعلیٰ پنجاب چوہدری پرویز الٰہی نے اپنے آفیشل ٹویٹر اکاؤنٹ سے ایک سیریز آف ٹویٹس کرتے ہوئے آرمی چیف جنرل قمر جاوید باجوہ کی پاکستان کیلئے خدمات پر روشنی ڈالی۔ پرویز الٰہی نے لکھا

-------------------------
اس ملک کو انتشار و فساد، خانہ جنگی اور ہر قسم کے حالات سے پاک فوج اور علماء کرام نے بچا رکھا ہے۔جنرل قمر جاوید باجوہ نے ہمیشہ تمام مسالک کے رہنماؤں، دینی مدارس اور تمام مذہبی طبقات کی بھرپور خدمت کی ہے۔ تحریک لبیک پاکستان پر جب آپریشن کا فیصلہ ہوا اور ملک کو خانہ جنگی کی طرف دھکیلا جانے لگا تو اس وقت آپریشن اور تشدد سے باز رکھ کرمفاہمت کی طرف لانے کیلئے جنرل قمر جاوید باجوہ نے جو کردار ادا کیا وہ آب زر سے لکھنے کے قابل ہے۔

اگر اس وقت جنرل قمر جاوید باجوہ اور علماء کرام معاہدہ نہ کرواتے تو پوری قوم بہت مشکلات سے دوچار ہو جاتی ۔مولانا فضل الرحمن کے دھرنے کا ایشو بھی جنرل باجوہ کی خصوصی کاوشوں سے ہی حل ہوا۔

جب تبلیغی جماعت پرسعودی عرب میں پابندی لگائی گئی اس وقت ایک وفد جس میں مولانا مفتی محمد تقی عثمانی صاحب، مولانا محمد حنیف جالندھری، رائیونڈ کی شوریٰ کے لوگ اور ہمارے ساتھی ایم پی اے حافظ عمار یاسر بھی شامل تھے، ہم جنرل قمرجاوید باجوہ سے ملے۔

جنرل قمرجاوید باجوہ نے ذاتی دلچسپی لے کر سعودی فرمانروا سے بیٹھ کر ان کو باور کروایا کہ یہ دین کا کام کرنے والی جماعت ہے اور ان کی ذاتی دلچسپی سے یہ مسئلہ بھی حل ہوا۔جنرل باجوہ نے سعودی قیادت کے ساتھ اپنا اثر ورسوخ استعمال کرتے ہوئے اس معاملے میں بھرپور اور موثر کردار ادا کیا۔
-----------------------