عمران خان احتساب عدالت میں پیش، نیب نے عمران خان کے 14 روزہ جسمانی ریمانڈ کی استدعا کردی

پولیس لائنز اسلام آباد میں قائم احتساب عدالت میں قومی احتساب بیورو (نیب) کی جانب سے گرفتار چیئرمین پی ٹی آئی عمران خان کے خلاف القادر یونیورسٹی ٹرسٹ کیس میں 14 روز کے جسمانی ریمانڈ کی استدعا کر دی گئی۔

ایڈیشنل سیشن محمد بشیر کیس کی سماعت کر رہے ہیں۔

دورانِ سماعت عمران خان کے وکلاء خواجہ حارث، فیصل چوہدری، علی گوہر اور علی بخاری عدالت میں پیش ہوئے ہیں۔

نیب نے عمران خان کے 14 روزہ جسمانی ریمانڈ کی استدعا کردی۔

احتساب عدالت کے جج محمد بشیر نے سماعت میں وقفہ کردیا۔

عمران خان کی وکلاء سے مشاورت
وقفہ ہونے کے بعد عمران خان نے اپنے وکلاء خواجہ حارث، فیصل چوہدری، علی گوہر اور علی بخاری سے مشاورت کی ہے۔

اس سے قبل پولیس لائنز میں لگنے والی عدالت میں عمران خان کے وکلاء پہنچے تھے۔

ایڈیشنل سیشن جج ہمایوں دلاور پولیس لائنز پہنچ گئے، جو توشہ خانہ کیس کی سماعت بھی کر رہے ہیں۔

نیب ذرائع کے مطابق نیب کی جانب سے عمران خان کے 14 روزہ جسمانی ریمانڈ کی استدعا کی جائے گی۔

عطاء تارڑ، محسن شاہنواز کمرۂ عدالت میں موجود
عمران خان کے خلاف کیس کی سماعت کے موقع پر ن لیگی رہنما عطاء اللّٰہ تارڑ اور محسن شاہنواز رانجھا کمرۂ عدالت میں موجود ہیں۔

عمران کے وکلاء کو پہلے روکا گیا
اس سے قبل پولیس لائنز پہنچنے والے عمران خان کے وکلاء بابر اعوان اور فیصل چوہدری کو اندر داخلے سے روکا گیا تھا۔

وزیرِ اعلیٰ گلگت بلتستان خالد خورشید اپنی سیکیورٹی کے ساتھ پولیس لائنز کے اندر چلے گئے۔

پی ٹی آئی رہنما شاہ محمود قریشی، اسد عمر اور ملیکہ بخاری بھی پولیس لائنز پہنچے۔

شاہ محمود، اسد عمر کو بھی داخلے سے روک دیا گیا
پولیس لائنز میں پی ٹی آئی رہنما شاہ محمود قریشی، اسد عمر اور ملیکہ بخاری کو بھی داخل نہیں ہونے دیا گیا۔

اس موقع پر شاہ محمود قریشی نے میڈیا سے گفتگو میں کہا کہ عمران خان سے وکلاء اور رہنماؤں کو ملنے نہیں دیا جا رہا۔

انہوں نے کہا کہ اس صورتِ حال میں ہم ہائی کورٹ جا رہے ہیں تاکہ وہاں بتا سکیں کہ ہمیں سماعت میں شرکت سے روکا گیا ہے۔

جج ظفر اقبال پر ہمیں اعتماد نہیں: فیصل چوہدری
عمران خان کے وکیل فیصل چوہدری نے میڈیا سے گفتگو کرتے ہوئے کہا کہ عمران خان کا کیس توشہ خانہ کیس کے جج کے سامنے لگایا جا سکتا ہے۔

انہوں نے کہا کہ توشہ خانہ کیس کے جج ظفر اقبال کو کیس کی سماعت نہیں کرنی چاہیے، ان پر ہمیں اعتماد نہیں، ان کے خلاف درخواست دائر کریں گے۔

فیصل چوہدری نے کہا کہ عمران خان سے ہمارا کوئی رابطہ نہیں، ہمیں کیس کا ریکارڈ نہیں دیا گیا، حکومت نے منصوبہ بندی کے تحت کارروائی کی۔

غیر اعلانیہ مارشل لاء ہے: بابر اعوان
پی ٹی آئی رہنما وعمران خان کے وکیل بابر اعوان نے پولیس لائنز میں میڈیا سے گفتگو کرتے ہوئے کہا کہ اس وقت ملک میں کوئی آئین نہیں، غیر اعلانیہ مارشل لاء ہے، نظر نہ آنے والی ایمرجنسی لگی ہوئی ہے۔

پولیس لائنز عدالت میں تبدیل
سابق وزیرِ اعظم عمران خان کے خلاف توشہ خانہ کیس اور القادر یونیورسٹی ٹرسٹ کیس کی سماعت آج ہو گی۔

عمران خان کو جوڈیشل کمپلیکس یا ایف ایٹ کچہری کی بجائے پولیس لائنز ایچ الیون میں پیش کیا جائے گا۔

توشہ خانہ کیس میں عمران خان پر فردِ جرم عائد ہو گی یا نہیں؟ اس بات کا فیصلہ آج ہو گا۔

ایڈیشنل سیشن جج ہمایوں دلاور نے آج عمران خان کو فردِ جرم عائد کرنے کے لیے طلب کر رکھا ہے۔

احتساب عدالت کے جج سے نیب عمران خان کے جسمانی ریمانڈ کی استدعا کرے گی۔

کمشنر آفس نے حفاظتی وجوہات کے باعث پولیس لائنز کو عدالت کا درجہ دیا ہے۔

سخت سیکیورٹی انتظامات
اسلام آباد کی اس پولیس لائنز کے باہر سیکیورٹی کے سخت انتظامات کیے گئے ہیں، جہاں ایف سی اور اسلام آباد پولیس تعینات کی گئی ہے۔

اسلام آباد پولیس کی جانب سے پولیس لائنز کے باہر کنٹینرز بھی لگا دیے گئے ہیں۔

پولیس لائنز کے باہر مزید کنٹینرز پہنچا دیے گئے، 3 لیئرز پر مشتمل سیکیورٹی تعینات کی گئی ہے۔

ایس ایس پی آپریشنز اور ڈی آئی جی آپریشنز نے سیکیورٹی صورتِ حال کا جائزہ لیا۔