سابق امریکی صدر ڈونلڈ ٹرمپ نے کچھ دن قبل فلوریڈا میں ریلی سے خطاب کرتے ہوئے اسرائیل اور حماس کی جنگ پر سخت موقف کا اظہار کیا۔ ڈونلڈ ٹرمپ نے کہا کہ ہم امریکہ میں اسلامی جہادیوں کو گھسنے نہیں دیں گے۔ ٹرمپ نے جو بائیڈن کی امیگریشن پالیسی کو تنقید کا نشانہ بنایا اور کہا کہ میری امیگریشن پالیسی یہ ہے کہ یورپ کی طرح امریکہ کو جہادیوں کا گڑھ نہیں بننے دوں گا۔ لندن کو دیکھو، پیرس کو دیکھو، جہادی کیسے گھوم رہے ہیں۔ ڈونلڈ ٹرمپ نے خاص طور پر مسلمانوں کو مخاطب کرتے ہوئے کہا کہ اگر تمہیں امریکہ سے نفرت ہے، اگر تمہیں اسرائیل سے نفرت ہے، اگر تم جہادیوں کے حامی ہو تو ہم تمہیں اپنے ملک سے ڈی پورٹ کریں گے۔ ہم حماس کی حمایت کرنے والے سٹوڈنٹس کے ویزے کینسل کریں گے۔ ڈونلڈ ٹرمپ نے مزید کہا کہ ہمارے کالجز اور یونیورسٹیز میں رشیدا طالب اور الہان عمر کھلے عام اسرائیل کے خلاف کیمپین کررہے ہیں۔ یہودیوں کے خلاف کھلے عام نفرت پھیلائی جارہی ہے۔