ٹھیک ایک سال پہلے رات کے اس پہر مجھے 142 دن کی بدترین جبری قید کے بعد رہائی ملی تھی۔ میں ٹوٹا پھوٹا تھکا ہوا چکنا چور ڈھیروں خدشات لیے اپنے گھر جا رہا تھا۔ میرے جسم پر اب کوئی نشان باقی نہیں مگر روح کے زخم ہیں کہ بھرتے ہی نہیں بلکہ وقت گزرنے کے ساتھ اور بھی گہرے ہوتے چلے جا رہے ہیں۔ میں نے پہلے جیسا بننے کی بہت کوشش کی مگر میں پہلے کی طرح بھول جانا اب نہیں جانتا۔ میں نے ان 142 دنوں میں دہائیوں کا سفر طے کیا ہے۔ واپس آیا تو لگا کہ شائد ظلم بند ہو جائے گا مجھے دوبارہ گھر سے اٹھایا گیا واپسی کے بعد چار گرفتاریاں ہوئیں۔ حج کا وعدہ کرکے عدالتی احکامات کے باوجود مجھے احرام میں گرفتار کیا گیا۔ کئی ماہ ہو گئے میں اب بھی اپنے بچوں اور ماں باپ سے دور ہوں۔ ایک بار پھر مقدمات کا سلسلہ شروع ہے۔
مگر اس ساری آزمائش میں میرا ایک بات پر ایمان بڑا پختہ ہوا ہے کہ میرا اللہ رب العزت ہی سب سے بڑا اور طاقتور ہے۔ باقی سب غلط فہمی ہے۔