کراچی: حالیہ دورہ چین کے دوران وزیراعلیٰ پنجاب شہبازشریف کی طرف سے چینی کمپنی کو نندی پور پاور پروجیکٹ پردوبارہ کام کیلیے رضامند کرنے کے بعدچینی کمپنی کے انجینئرزنے نندی پور پاور پروجیکٹ پر کام کو تیزکردیا ہے۔
واضح رہے کہ چینی انجینئر گزشتہ دورحکومت میں حکمرانوں کی طرف سے منصوبے میں تاخیری حربے اختیار کرنیکی وجہ سے کام چھوڑ کر وطن واپس چلے گئے تھے مگر اب معروف چینی کمپنی ’’ڈونگ فینگ الیکٹرک‘‘ (DONGFANG ELECTRIC )کے انجینئرچن ہووائی (Chen Huawei ) کو کراچی بھیج دیاہے جو گزشتہ 2روزسے نیسپاک کے ماہرین اور پروجیکٹ کے ایڈیشنل ڈائریکٹرممتاز میمن کے ہمراہ کراچی پور ٹ پر پاورپلانٹ کی مشینری و دیگر سامان کی دستیابی ، مقداراوراُسے سائٹ پر منتقل کرنے کے لیے مختلف پہلوؤں کاجائزہ لے رہے ہیں۔ نندی پورپاور پروجیکٹ کی مالیت23ارب روپے مالیت سے بڑھ کر 57 ارب روپے تک پہنچ گئی اور اس منصوبے کے آپریشن ہونے سے450میگاواٹ بجلی حاصل ہوگی۔

Source: Express News